اعتقد أن البلد قد وصلت للحد الذي يجعل كل شخص يتحسس خوفه من المصير الذي ينتظرها وان كان السياسيون بعيداً عن الشارع ولايعلمون أنه مرجل يغلي فهي مصيبه لأن الناس ماعاد لديها ماتخسره وقد خسرت كرامتها وصحتها وأدميتها!!
وأن كان السادة في قيادة الدولة لايعلمون أن البلد علي وشك الانهيار والفوضى قد ضربت أطنابها في كل المؤسسات فهذه مصيبة كبيرة تانية
وكدي أقول ليكم انا عايزة واحد من هؤلاء السياسين وقادة الاحزاب والمدورين فينا حديث عن الوطنية والوطن والمواطن يجاوبني البلد دي ماشه علي وين؟ الحل شنو ؟حتي نخرج من هذه الورطة الكبيرة التي علقنا فيها
انا عايزه واحد من قادة الحركات المسلحة الذين جاء بهم استحقاق السلام واكتفوا حتي الان بما وفرته لهم الحكومه من بيوت فارهة وعربات مكندشة وأصبحت قضيتهم قطر وكاس العالم كماهو مناوي مشغول هذه الايام ونسوا قضيتهم الاساسية قضيه انسان الهامش المظلوم ظلم الحسن والحسن انا عايزة أسألهم البلد دي ماشه علي وين ؟وشنو رؤيتهم للخروج من هذه الازمه؟ شنو الحلول المطروحة لتتفادي حرب أهلية تغذيها الكراهية والعنصرية؟ شنو رؤيتهم لرفع الهمم وليعرف البني ادم السوداني أن الوسيله الوحيده للخروج من ألازمه أن يصبح منتجاً ومعتمداً علي ضراعه؟؟
انا عايزه أسال قيادة البلد وعلي رأسها الفريق أول البرهان البلد دي ماشة علي وين ياسعادتك ؟؟ماالذي تنتظره لتقوم بدورك الذي وضعتك فيه الاقدار لتحافظ علي تماسك الامه وتحفظ لها شرفها من العبث والاستهبال الذي يمارسه البعض علي عينك ياتاجر وانت تعلم ذلك ؟؟
انا عايزه اسالك ياسعادتك انت منتظر شنو لتشكل حكومة مسؤوله تدير شؤون البلد ؟؟منتظر شنو وقحت أنكشفت لدي الشعب السوداني وهزمت نفسها بنفسها وقد قدمت نموذجاً فاشلا في الحكم ؟منتظر شنو والمجتمع الدولي المشغول بمشاكله وازماته الاقتصادية اعترف بك علي العلن ؟
منتظر شنو وقد تكاملت مبادرة كبيره كمبادرة الخليفه الطيب الجد وأصبحت أرضية خصبة لتوافق وطني إلا لمن أبي ولم تتنزل مخرجاتها الي أرض الواقع وراحت المليارات التي دفعت فيها شمار في مرقه ؟؟
منتظر شنو ياسعادتك والبلد كل يوم في أضرابات ؟
منتظر شنو ياسعادتك والغلاء طحن الناس ؟
منتظر شنو ياسعادتك والشعب السوداني تحول الي شعب حزين وتعيس مافي زول عنده نفس لأي حاجة والناس من اصبح همها تاكل شنو تشرب شنو وتصل نص الشهر كيف؟
اعتقد أننا قد تعدينا مرحلة أن نحزر من الخطر لأننا الان في قلب العاصفه تقذف بنا يميناً ويساراً والقادم أسوأ وواضح أنه مافي زول جايب خبر أو أن هناك من يريدها أن تصل لمرحلة الحريق وعندها لن نجد وطناً نبكي عليه
كلمه عزيزه
أمس عاني المواطن من انقطاع الكهرباء وانقطاع المياه وتوقف الشبكه في كثير من المؤسسات والخدمات بمافيها خدمة بنكك
لكننا حمدنا الله كثيراً أن الاوكسجين ليس من مسؤوليات الحكومه وإلا كان الضحك شرطنا
كلمه أعز
بلد من غير وجيع
عز الكلام.. أم وضاح تكتب: حتماً سيسألكم الله !!!!
