المقالات

زوايا المرايا.. د.زينب السعيد تكتب: يوميات زولة صايمة

تسارع الأحداث السياسية والاجتماعية وحتي الدينية في بلد كالسودان مع ضغوط المعيشة غير المسبوقة احدثت في رأسي( الكبير) ورشة صناعات للاحداث..تارة احلل، وأخري انظر ، ومره اسرح ومره افرح ومره تغلبني القراية..
عالم الوسائط عالم مجنون متسارع تشعر وكأنك في داخل لوحة فنان تشكيلي (جايطة) بالالوان، ماعارف روحك انت ( اخضر ولا احمر ، ولا يمكن بنفسجي)..
رمضان( كان زمان) حلو في السودان، الان غايتو اللهم اني صائمة، وعزاءنا الوحيد ( انما يوفي الصابرين أجرهم بغير حساب) …
المهم لازم اوريكم طبقت الصبر كيف ؟ فمن أهم المعالم في حلتنا( دكان جمال) وجمال فتي صبوح الملامح خدوم هميم(مالئيم) لايخرج كراسة الجرورة مهما زادت
( شجون ) نسوان الحلة ومرات بعفي حقو كمان ..المهم دكان جمال في طريقي ( خارجة داخلة ) الليلة كان الشغل حااار وفي مكان بعيد والزحمة والمواصلات وووو ولمن جات الساعة تلاتة شوكة وبالي في ( العصيدة ) والكهرباء القاطعة وووالعطش..وقفت جمب دكان جمال عشان اشتري حاجة…لقيت شاب ود جيرانا مفتول العضلات مشرأب الفلنكات شلولخ…متكل في ( بمبر تحت الشجرةالقدام الدكان ) بالمناسبة الشجرة دة حأشتكيها لناس الكهرباء لانها ابرد حتة في الحلة…
ولعجبي الشاب ماسك قزازة ببسي باااااردة لأمن مندية بره..ويشرب بدون مايراعي لحق ( الجيرة) ولا للعطش ولا لصيامي..عاد نان ياولدى مابالغته..ياجماعة بصراحة قزازة الببسي تعبتني والود ده جرح صيامي وهزم معنوياتي واصابني في الرباط الصليبي لمشاعري الدينية..
وانا بعمل في العصيدة الحر…الكهرباء قاطعة ..الغاز مافي وزجاجة الببسي تتراقص زي ( شنو كدة ماعارفة)..
تبآ لك أيها الفتي لقد دمجت الالوان وتداعيات السياسية والاحباط الاجتماعي مع الجفاف( في تلك النداوة ) اسي كان سالتك فاطر لشنو؟ اكيد ماعيان ولو عيان تقعد في بيتكم وناخد علاجك حتي الببسي ماصحي مع الامراض..ولاحلو ولابارد ولا حاجة.. !!
وانا بقطع في العصيدة وشاعرة بكل انهزام الدنيا قررت رفع دعوى ضد نفسي الامارة بالسوء…استغفر الله العظيم…وضد ود الجيران…وضد جمال …
زاوية اخيرة ..
عندى سؤال مهم هل من الممكن ارفع دعوى ضد شركة الببسي؟ هل ولاما هل؟


مواضيع ذات صلة

همس الحروف.. تجميد قرار زيادة تعرفة الكهرباء (إنجاز بحجم وطن)… شكراً جزيلاً برطم بقلم :الباقر عبد القيوم علي

عزة برس

سيوف ناعمة.. جبريل والدوشة بقلم : عائشة الماجدي

عزة برس

فتح الرحمن النحاس يكتب : أحذروا ألغام فولكر..

عزة برس

بعد بيان الترويكا والاتحاد الاوربي ..عراقيل دولية امام الحكومة السودانية

عزة برس

بيانات الترويكا الدولية، ومستقبل الإنقلاب.. بقلم: د. علي مالك عثمان

عزة برس

جهاز الأمن بين الجاهزية والإجهاز بقلم : عمار العركي

عزة برس