روح احدهم لم يدون اسمه على في ذيل الرواية تفاصيل طريفة عن ما اسماه ( اختطاف بص سياحي) اورد خلالها وبطريقة شعبية مبسوطة تفاصيل ما جرى لهم خلال رحلة سفرية كانت متوجهة إلى سنار..(عزة برس) تنقلها دون تصرف
اتعرضنا لعملية اختطاف بص سياحي
البص متحرك من الخرطوم لسنار في امانتي الله وفجأة قام زول راكب في آخر البص أتكلم مع المضيف شوية وبعدها مشى أتكلم مع السواق .. السواق استمع ليه بصمت بدون مايرد عليهو .. حصلنا الكافتيريا المفروض ننزل فيها والسواق ولااااا عليهو استمر في المشي والناس المتعودين يمشو بالشارع داك زهجو واتكلمو مع المضيف مستفسرين عن عدم وقفة البص في الكافتيريا ولما الجوطة حصلت مع السواق قام الزول القبيل داك ووقف في مقدمة البص وقال للناس ياجماعة عندنا كافتريا جديدة والليلة الافتتاح ودايرنكم تشوفوها وتورونا رايكم .. البص انعطف ونزل من الزلط في طريق ترابي والناس مستغربين ومخلوعين .. سبعة دقايق بالضبط ونفس الزول القبيل طلب من السواق يشغل البوري وكنا واقفين قدام قرية صغيرة ومابعيدة من الزلط .. نفس الزول اخد نفس عميق وخاطب الركاب وقال ليهم ياجماعة عن اذنكم داير اقول ليكم كلمة غريبة شوية .. أنا ياجماعة من القرية دي ومشيت الخرطوم من سنة ٩٣ وسكنت في بيت عزابة معاي زول .. الزول دا من ابيي .. والله من ما الله خلقني ماخاويت زول ذي الزول ولا لاقيني زول في سماحة قلبو وطيب معشرو .. طيلة الفترة دي لا جا بلدنا ولامشيت بلدو وهسي لما لمتنا السفرية دي مع بعض وقبل البص دا مابتحرك ضربت لي ناس بيتنا وقلت ليهم انا والرشيد صاحبي ماشين سنار وبالله جيبو لينا حاجة من ايدكم ناكلها في الكافتيريا وابوي عشان جا عمل عملية عندنا في الخرطوم حلف إلا البص الجايين بيهو كلنا يخش الحلة ويفطر عندنا .. دحين اعفو لينا واجبرو بخاطر الحلة الصغيرة المجهولة دي وما بتتاخرو ان شاءالله .. الوكت كان الجماعة جو بي نحاسهم ونوبتهم والشفع شايلين الابريق وايد الرشيد ود ابيي كانت بتتخاطفها أيادي الناس في القرية الصغيرة .. كان احتفال من غير ترتيب والصيوان الصغير شال ناس والباقين تحت الشجر وفطرنا فطور صاح وشربنا الشاي وكاننا جايين في بص سيرة وكاننا كلنا بنتعارف .. كانت حادثة اختطاف من بص سفري لي قرية صغيرة .. ركبنا وعيونا مرقرقة من الحادثة الغريبة الحصلت لينا… ياهوا ده السودان